Monday, September 9, 2019

ගුණේ අංකල් මගුල් ගෙදර ගිය හැටි




ගුණේ අංකල්ට කාර් පිස්සුව හැදුනේ පැන්ෂන් ගියාටත් පස්සේ. ඉස්සර ගුණේ අංකල් රස්සාව කරන කාලේ ඩ්‍රයිවර් එක්ක තමයි හැම තැනම ගියේ. ඒ කලේ ගුණේ අංකල් ඉඳහිටක නොකර බැරිකමට ඩ්‍රයිව් කළා ඇරෙන්න මහා ආසාවකින් වාහන පදින්න ගියේ නැහැ. ගුණේ අංකල්ගේ තියරිය උනේ වාහන තියෙන්නේ ගමන් කරන්න මිසක් ජොලි කරන්න නෙමෙයි කියන එකයි.

පැන්ෂන් යන්න කලින් ගුණේ අංකල් පැන්ෂන් ජීවිතේ ගැන මාර සැලසුම් ගැහුවා. මාදු ගඟේ ඔරු පදින්න, යාපනේ ගිහින් නාගදීපේ බලන්න, චීනේ ගිහින් බඩු ගේන්න, ඉස්කෝලයක් ළඟින් ස්ටේෂනරි කඩ කෑල්ලක් දාගන්න; ඔන්න ඔය වගේ හැට හුටහමාරක් දේවල්.  ඔය ලිස්ට් එකේ කවදාවත් ඩ්‍රයිවින් සම්බන්ධ දේවල් තිබ්බේ නැහැ.

වයසට යද්දී ගුණේ අංකල්ට පොඩි පොඩි අමතකවීම් එහෙම වෙන්න ගත්තා. වැඩට ගෙනියන බ්‍රීෆ්කේස් එක අමතක වීමෙන් පටන් අරගෙන ගෙදරට දාගෙන හිටපු බාටා සෙරෙප්පු දෙක පිටින්ම ගුණේ ඇන්ටිට යන්නං කියලා යන්න පිටත් වීම වගේ දේවල් වෙන්න ගත්තම ඇන්ටි ටිකක් කලබල වුණා. කොටින්ම ලංකාවේ මිනිස්සු හැම අමතකවීමක් සම්බන්ධයෙන්ම කියන 'දවසක කලිසම නැතුව වැඩට යයි' කියන එක පවා ගුණේ ඇන්ටි කිව්වා. ඒ වුණාට ගුණේ අංකල් සැලුණේ නැහැ.

"වයසට ගියාම මිනිහෙකුට අමතක වීම වෙන්න ඕනා. නැත්තං ඒක පට්ටි දාපු එළදෙනක් වෙලත් කිරි එරුණේ නැහැ වගේ වැඩක්."

ගුණේ අංකල් කිව්වේ එහෙමයි.

"අනේ මේ කුණුහබ්බ කියන්නේ නැතුව ඉන්න අනේ!"

ඇන්ටි උත්තර දුන්නේ එහෙමයි.

ඔහොම තත්ත්වයක් තියෙද්දී පවා ගුණේ අංකල් පැන්ෂන් ගියාම ගුණේ අංකල්ගේ පුත්තරයා අංකල්ට කොරොල්ලා කට්ටක් අරගෙන දුන්නා.

"තාත්තව මරාගන්නද හදන්නේ උඹ?"

ගුණේ ඇන්ටි පුතණ්ඩියාගෙන් ඇහුවේ එහෙමයි.

"නැහැ ජීවත් කරවන්න. ජීවිත කාලෙම රස්සාව කරපු මනුස්සයෙක් ගෙදරට සීමා උනොත් බෙල්ලේ වැල දාගන්නවා. ඔය ඔරු පදින චීනේ යන කඩ දාන වැඩ අපේ තාත්තා කරන්නේ නැහැ. අඩු ගානේ මාකට් එකට හරි යන්නේ නැතැයි."

පුතණ්ඩියා හිනාවෙලා උත්තර දුන්නා.

ගුණේ අංකල්ට තෑග්ගට මාර සතුටුයි. මොකද පෙන්ෂන් ගියාම තමයි ගුණේ අන්කල් දැනගත්තේ තමන් චීනේ තියා තූත්තුකුඩියේ වත් යන එකක් නැහැ කියලා. මිනිස්සු කවද්ද ප්ලෑන් කරපු දේවල් කළේ? ඉතිං ගෙදරටම වෙලා ඉන්නවට වඩා කාර් එක අරන් මාකට් එකට වත් යන්න ලැබෙන එක කොච්චර හොඳද කියලා ගුණේ අංකල්ට මීටර් උනා. ඒ සන්තෝසෙට අංකල් අවුරුදු පහළවකට විතර පස්සේ පළවෙනි වතාවට පුතණ්ඩියා බදාගෙන ඉම්බා. පුතණ්ඩියා ලැජ්ජාවෙන් පස්සට උනා.

ගුණේ අංකල් ඉතිං තමන්ගේ පාඩුවේ මාකට් එකට ගිහින් කෙහෙල්ගෙඩි සහ පොල්තෙල් ගේනවා වගේ වැඩ කරගෙන ඉන්නකොට දවසක් අංකල්ගේ පැත්තේ ඥාතියෙක් බඳිනවා කියලා වෙඩින් එකකට ආරාධනාවක් ආපි. ඒක අහලා ගුණේ ඇන්ටි ගස්සලා අහක බලාගත්තා.

"ඕකුං අපේ මගුල් තුලා වලට ආවද? අපි යන්නේ මොකටද?"

ගුණේ ඇන්ටි රවලා බලලා එහෙම ඇහුවා.

"මේ නහින දෙහින වයසට තරහ මරහ තියාගන්නේ මොකටද නෝනේ? අපි ගිහින් එමු. මට කාර් එක දුර එළවන්නත් පුළුවන්."

ගුණේ අංකල් හිනාවෙලා කිව්වා.

ඒ වුණාට ඇන්ටි ගමන යන්න ආවේ නැහැ. තනියම යන්න එපා කියලා කිව්වට ගුණේ අංකල් ඇහුවෙත් නැහැ. ඇන්ටි කාමරේට වෙලා ඔරෝගෙන ඉද්දීම 'මම ගිහිං එන්නං' කියලා ගුණේ අංකල් කාර් එකේ මගුල් ගෙදර යන්න පිටත් වුණා.

ගුණේ අංකල්ට සාමාන්‍යයෙන් පාරේදී නම් කේන්ති යනවා. ඉතින් ටික දුරක් යනකොට පාරේ නීති කඩන වාහන කාරයෝ ගැන ගුණේ අංකල්ට මාර තරහයි. තනියම හබ්බ කිය කියා ගුණේ අංකල් වාහනේ ගෙනියනවා.

ටික වෙලාවක් යද්දී මෙන්න ගුණේ අංකල්ගේ ෆෝන් එක රිං වෙනවා. ස්ක්‍රීන් එක බැලින්නම් ගුණේ ඇන්ටි. අනික් මිනිස්සුන්ට බැන්නට ඒවා ගුණේ අංකල්ට අදාළ නැති නිසා ගුණේ අංකල් එළවන ගමන්ම ෆෝන් එක ආන්සර් කළා.

"හෙලෝ?"

මෙන්න බොලේ ඇන්ටි එහා පැත්තේ ඉඳන් තරහා අමතක කරලා හෙන කලබල හඬකින් කතා කරනවා.

"අනේ ගුණේ. ඔයා යන පාරේ කවුදෝ කාර් කාරයෙක් රෝං සයිඩ් යනවලු පිඹගෙන. දැන් වාහන කීපයකම හැප්පෙන්න ගියා ලු. පොලීසියට තාම කාර් එක හොයාගන්න හම්බෙලත් නැහැ ලු. මේ දැන් ටීවී එකේ කිව්වේ. අනේ ගුණේ ඔයා පරිස්සමින්."

ගුණේ අංකල් වීදුරුවෙන් ඉස්සරහයි වටපිටයි හොඳට බලලා, බොහොම සීරියස් හඬකින් මෙහෙම කිව්වා.

"එකෙක් නෙමෙයි නෝනේ. අද නම් ලංකාවටම අමු කැවිලද කොහෙද. මගේ ඉස්සරහින් එන හැම එකාම එන්නේ රෝං සයිඩ්!"

(ප්‍රසිද්ධ විහිළු කතාවක සිංහල අනුවාදයකි)

තරිඳු ශ්‍රී ලොකුගමගේ 



කාර් පිස්සුව/ Soi 11 පොත් 

Online orders: grantha.lk 
සරසවි, සදීපා, ගොඩගේ, දයාවංශ ජයකොඩි, සූරිය, සමයවර්ධන, අහස, ලුමිනෙක්ස්, Expograpchic ඇතුළු පොත්හල් වලින්.  

Sunday, August 25, 2019

අන්තිම කලර් ලයිට් එක හෙවත් ලංකාවේ කාර් සංස්කෘතිය මගහැර යා නොහැකි මොහොත




අන්තිම කලර් ලයිට් එක...

සමුගන්න කලින් දකින අන්තිම හැන්දෑව, අන්තිම තරුව, අන්තිම බස් හෝල්ට් එක සහ තවත් අන්තිම ගොඩක් දේවල් ගැන ගොඩක් කවි ගීත ලියවිලා ඇති. නමුත් අන්තිම කලර් ලයිට් එක ගැන කවුරුවත් තාමත් ලියලා නැහැ.

අහිමි වෙන්න නියමිත ආදරයක අවසාන දවසේ, සමුගන්න නියමිත මොහොත එන්න මොහොතකට කලින් අන්තිම කලර් ලයිට් එක ගාවදී ක්ලච් බැලන්ස් එක ගන්නකොට ඇඟිලි තුඩු වලින් පටන් අරන් කකුල දිගේ ඇඟට ඇතුළු වෙලා හදවත පාරගෙන පාරගෙන යන වේදනාව දන්නේ ආදරයෙන් පැරදිච්ච කාර් පිස්සෝ විතරයි.

ඒ කලර් ලයිට් එකෙන් සංකේතවත් වෙන්නේ බදාගෙන අල්ලගන්න දඟලන, ඒ වුණාට අත්හැරිලා සදාකාලිකව මතක ගොන්නක් අස්සට වැදිලා නොපෙනී ගිහින්, හීනෙන් වත් නොහිතන වෙලාවල ආපහු ඔළුව උස්සලා ජීවිතය හීනෙන් වත් නොහිතන අගාධ වලට තල්ලු කරන නිමේශයක් එන්න කලින් එන තාවකාලික ඇබිත්තන් ප්‍රමාදයක්!

හිත්පිත් නැති වැස්ස සහ ලුණුම ලුණු රස හුළඟ එක්ක අඩෝව් ගාගෙන කඩාවදින මහා මෝසමකට කලින් පිපිච්ච අන්තිම කහමල් කිනිත්ත වගේ...

අහසේ ඉර එළිය මුවා කරන තරමට රෑන් රෑන් පියාඹලා ඇවිත් අස්වැන්න වහගන්න කෘමි සත්තු වසංගතේකට කලින් හුළඟට ප්‍රතිචාර දක්වන නොදක්වන ගාණට පීදුණු එකම එක ලා රන්වන් කරලක් වගේ...

ජීවිත කාලයක් තිස්සේ කොහොම කොහොම හරි ආරක්ෂා කරගත්තු ආත්ම ගරුත්වය එක මිලිතප්පරේකින් හෝදලා යවන මහා කඳුළු වැස්සක් හංගගන්න මූණේ මවාගන්න දඟලන අසාර්ථක හීනි හිනා රැල්ලක් වගේ...



දැන් මෙහෙම ලියනකොට කෙනෙක් කියාවි, ඕක ලංකාවට අදාළ දෙයක් නෙමෙයි, ඕක ඇමරිකාව වගේ රටවලට අදාළ දෙයක් කියල. එයාලගේ තර්කය තමයි ලංකාවේ තරුණ පරපුර ඇමරිකාවේ තරුණ පරපුර තරමට මහා පරිමාණයෙන්  වාහන එක්ක ගනුදෙනුවක්  නැහැ කියන එක. අපි බොහෝ දෙනෙක් තාමත් ලංකාවේ තරුණ පරපුර, ආදරය, විරහව වගේ දේවල් කතා කරදී ඔළුවෙන් මවාගන්නේ පොදු ප්‍රවාහන සේවාවල්, මුහුදු වෙරළවල්, පරණ ඩෙනිම්, කඩල කරත්ත සහ සරුවත් වගේ දේවල්.

ඒත් ඇත්තටම, අපි පිළිගන්න කැමති වුණත් අකමැති වුණත්, තත්ත්වය වෙනස් වීගෙන එන්නේ. ඇමරිකාවේ තරුණ තරුණියෝ මීට සියවසකට විතර කලින් ඉඳන් තමන්ගේ නිදහස, ස්වාධීනත්වය වගේ දේවල් එක්ක මෝටර් රථය කියන එක අනන්‍ය කරගත්තා වගේම, ලංකාවේ තරුණ පරපුර වේගයෙන් තමන්ගේ ස්වාධීනත්වය එක්ක මෝටර් රථ අනන්‍ය කරගනිමින් ඉන්නවා. මේවා දියුණු රටවල වගේ බ්‍රෑන්ඩ් නිව් කාර් නොවෙන්න පුළුවන්. අනික් අතට අපට දියුණු රටවල වගේ යම් යම් සීමාවන් වලට යටත්ව හෝ අපේ රසිකත්වයට අනුව වාහන වෙනස් කරගන්න අයිතිය නැතුවා වෙන්න පුළුවන්. නමුත් අපි කාර් එක්ක ඇතිකරගෙන යන මේ සුන්දර බැඳීම අපේ සීමාවන් ඇතුළේ අපි අර්ථ දක්වමින් ඉන්නවා.



අද නිකමට සෝෂල් මීඩියා වල එහාමෙහා ගිහින් බලන්න. කාර් ක්ලබ්ස් වැහි වැහැලා. වාහන ගැන කතාකරන ෆේස්බුක් පිටු වැහි වැහැලා. බ්ලොග් ලියවෙනවා. වෙබ් සයිට් එක දෙක හැදෙනවා. වාහන සම්බන්ධ උත්සව දැන් දැන් ඉස්සරට වඩා විශාල පිරිසකට විවෘත වෙලා. මේ සියල්ල අස්සේ මතවාද, මතභේද නැතුවා නෙමෙයි. නමුත් අපි වේගයෙන් කාර් සංස්කෘතියක් වැළඳ ගනිමින් ඉන්නවා. අනික් අතට මෝටර් සයිකල් සම්බන්ධයෙන් ඒ වගේම විශාල රසික පිරිසක් බිහිවෙලා ඉන්නවා. මම 'කාර් සංස්කෘතිය' කියන යෙදුම පාවිච්චි කරන්නේ ඒ හැමෝටම පොදු දෙයක් විදිහට.

අද අපේ මිතුරු මිතුරියෝ තමන් ආදරය කරන අය එක්ක කාර් වල, බයික් වල නැගලා සංචාර වල යනවා. ක්ලබ් වල අය එකතු වෙලා කරන ඉවෙන්ට්ස් වලට යනවා. මේ අතරේ ආදරයන් උපදිනවා, මියයනවා, ආයේ අලුතින් උපදිනවා.

පළවෙනි කලර් ලයිට් එක සහ අන්තිම කලර් ලයිට් එක මතකයක් වෙන්න පටන් ගන්නේ මෙතනින්.



අපි තාමත් ඒ ගැන කතාකරන්න පටන් අරගෙන නැහැ. සමහරු හිතනවා ආදරය අස්සට කාර් ගැන මතක ගේන එක අභව්‍යයි කියලා. සමහරු හිතනවා එහෙම කිව්වම අර තමන්ට දරාගන්න බැරි දේවල් වලට දමලා ගහන්න පාවිච්චි කරන 'පොෂ්' කියන පදයෙන් දමලා ගහාවී කියල.

නැහැ.

දැන් අපට තරුණ පරපුර ගැන, ආදරය ගැන, අහිමිවීම ගැන කතා කරද්දී කාර් ගැනත් කතා කරන්න වෙන කාලය ඇවිත් තියෙන්නේ. කාර් දැන් අපේ සංස්කෘතියේ කොටසක්. ඒක තාක්ෂණයක් නෙවෙයි කලාවක්. සජීවී කලාවක්.

සජීවී කලාවක් ඇතුළේ තමයි නියම ආදරේ හැමතිස්සෙම හමුවෙන්නේ.


- තරිඳු ශ්‍රී ලොකුගමගේ

Soi 11 පොත්:
වයර් පොටක සෞන්දර්ය
සැප්තැම්බර් වන්නට පෙර එළිදකී 



















ප්‍රධාන පෙළේ පොත්හල් වලින් සහ අන්තර්ජාල පොත්හල් වලින්

Wednesday, March 27, 2019

Saab Monstret - යකාගෙ කතාවක්

vectorville.blogspot.com


SAAB කියන්නේ අරක්කු හදන අතරේ මුරුක්කු හදලා අරක්කු ගැන කතා කියලා අරක්කු එක්ක මුරුක්කු විකුණපු කොම්පැනියක්...

සැර වැඩිද? 

එහෙනං මෙහෙම කියන්නං. SAAB කියන්නේ ප්ලේන් හදන අතරේ කාර් හදපු, ප්ලේන් වගේ කියලා කාර් විකුණපු කොම්පැනියක්... 

මේකෙන් අදහස් වෙන්නේ නැහැ SAAB  නරකයි කියලා. ඒ නිසා සාබිස්ට් ලා (SAAB කියන එකට ist  ප්‍රත්‍යය දාලා මම මේ දැන් අටෝපු වචනයක්. ක්ලාක්සන් මීට කලින් මේ වචනේ හදලා තියෙන්න බැරිකමක් නැහැ) තරහ වෙන්න එපා මාත් එක්ක. ඇත්තටම මම ඕවට පුදුම ආසයි. අවාසනාවකට ලංකාවේ මේවා හොයන්න හරිම අමාරුයි. ඔය සැරින් සැරේ ෆේස්බුක් එකේ මතුවෙන, කොහේදෝ අතඇරලා දාපු අසූව හෝ අනූව දශකයේ Saab එකක ෆොටෝ එකක් තියනවා. ඒක දැක්කම මට දැනෙන්නේ කවියටවත් නගන්න බැරි විදිහේ අමුතු දුකක්. 

SAAB කියන්නේ Svenska Aeroplan Aktie Bolag (Swedish Airplane Corporation - ස්වීඩන් ගුවන් යානා සමාගම) කියන එක. ඒ අතින් බැලුවම, නමේම ප්ලේන් කෑල්ල තියනවා නං, ප්ලේන් ගැන කියලා කාර් විකුණන්න අයිතියක් තියනවා. 


Pinterest

SAAB ෆැක්ටරිය පටන් ගත්තේ ස්වීඩනයේ Trollhattan වල, 1938 අවුරුද්දේ. 1939 දී දෙවැනි ලෝක යුද්ධය පටන් ගත්ත නිසා එයාලට කරන්න වුණේ ස්වීඩනයේ ගුවන් හමුදාව වෙනුවෙන් ප්ලේන් හදන එක. මුලින් ජර්මන් සහ ඇමරිකන් ප්ලේන් වල ඩිසයින් කොපිකරපු එයාලා 1941 වෙද්දී තමන්ගේම ඩිසයින් එකකින් ප්ලේන් එකක් එළිදැක්වූවා කියලා කියනවා. 

ලෝක යුද්ධය ඉවර වුණාට පස්සේ එයාලා යුද්ධ ගුවන් යානා නොවන, SAAB 91 සහ 92 මාදිලි හඳුන්වලා දුන්නා. මේ අතරේ යුද්ධයෙන් පස්සේ සාමාන්‍ය සමාජයෙන් මතුවෙමින් තිබුණු අවශ්‍යතා වෙනුවෙන් මෝටර් සයිකල්, කාර් වගේ දේවල් හදන අදහස ආවා. වොල්වෝ සමාගම ඒ වෙනකොටත් ස්වීඩනයේ කාර් හදමින් හිටියේ. කොහොමහරි SAAB තීරණය කළා කාර් හදන්න. 


SAAB 91C- Wikipedia 


ඔන්න ඔහොමයි Saab Ursaab එක බිහිවෙන්න පාර කැපුණේ. UR කියන්නේ ස්වීඩන් භාෂාවෙන් ඔරිජිනල් කියන එකට සමාන දෙයක් ලු. ඒ අනුව Ursaab කියන්නේ ඔරිජිනල් SAAB එක කියනවා වගේ දෙයක් (අනික් අතට Saab Ursaab කිව්වම බංග්ලාදේශය වගේ රටක ක්‍රිකට් ක්‍රීඩකයෙක් මතක් වෙන්නත් පුළුවන්). ඇත්තම Saab Ursaab කියන නම පාවිච්චි වුණේ Prototype එකකට. ඒ කියන්නේ නිෂ්පාදනයට කලින් හදන ආදර්ශ කාර් එකක් වගේ එකකට. 

Saab Ursaab එක දැක්කම මට අර වෙලාවක් කලාවක් නැතුව ගෙවල් වලට රිංගලා කරුකුරු ගාන, ඇඟේ එල්ලුනොත් වඳුරු නෙමෙයි ගෝරිල්ලා කුනුහර්පත් කියවෙන, අහුවුණාම පූසෝ ෆුට්බෝල් ගහන්න පාවිච්චි කරන, පොල් කුරුමිණියන්ට වඩා ජූනියර් සාමාන්‍ය කුරුමිණියෙක් මතක් වෙනවා. 

ඒ වගේම Split Beetle එකකුත් මතක් වෙනවා. 


ericdymock.blogspot.com


Flickr


කොහොම වුණත් මේ ලිපියේ අරමුණ ඕක ගැන කතා කරන එක නෙමෙයි. මේකේ අරමුණ යකාගේ කතාව ලියන එක. 

ලෝක යුද්ධ ඉවර වෙලා, මිනිස්සුන්ට ආයේ සෙල්ලම් දාන්න පුළුවන් කාලේ ආවේ 50 දශකයේදී. ඉතින් ඔය කාලේ නිෂ්පාදන ආර්ථිකයක් තියන ගොඩක් රටවල් උඩු පිනුම් යටි පිනුම් බඩ පිනුම් දෙපරංස පිනුම් ගහන්න පටන් ගත්තා. 

SAAB ඩිසයිනර් ලත් ඉතින් මේ පිනුම් නොගහා හිටියේ නැහැ. Catherina සහ Saab Sonett Super Sport (Sonett I) කියන්නේ මේ පිනුම් වල ප්‍රතිඵල තමයි. Saab Monstret (The Monster) ත් එහෙම ජල්ලියක ප්‍රතිඵලයක්. 


 Sonett Super Sport (Roadster) 1956- Pinterest 

මේක කට්ටියට තේරුම් ගන්න ලේසි වෙන්න, මම ඉවුම් පිහුම් වැඩසටහනක රෙසිපි එකක් විදිහට ලියන්නම්. 

සාබ් යකෙකු සාදාගන්න ආකාරය 

හොඳට තියන SAAB 93 කාර් එකක් ගන්න. 

දිවීමට අවශ්‍ය නොවන සෑම කැබැල්ලක්ම ගලවන්න. ඒවා යකඩ වලට විකිණීමට සිතීමෙන් වළකින්න. 

බොනට්ටුව ඉවත් කර ඒ වෙනුවට ප්ලාස්ටික් පියනක් යොදන්න. හොල්මන් නොවී මදක් ඉවසන්න. 

748cc three cylinder two stroke එන්ජින් දෙකක් ගෙන එන්ජින් බේ එකේ සවිකරන්න. 

දැන් කාත් කවුරුවත් නැති වෙලාවක පාලු ගුවන් තොටුපළක ධාවන පථයක් වෙත රැගෙන යන්න. 

වටපිටාවේ කවුරුත්ම ස්වාධීන වගකිව යුත්තෙක් නැතිදැයි හොඳින් තහවුරු කරගන්න. 

ගෙදර ගෑනි සහ දරුවන් මතක් වෙන මට්ටමට ලෑල්ලට පාගන්නැයි රියදුරාට කියන්න. 

එක පැත්තකට පමණක් ධාවනය කරවා වෙලාව සටහන් කරගන්න. 

ආපසු ෆැක්ටරියට ඇවිත්, තමන් කරපු වැඩෙන් මෙලෝ යකෙකුට මෙලෝ වැඩක් නොවුණු බව දැනගන්න. 

පැත්තකට ගොස් ගංගාවක් සේ වැළපෙන්න! 



මෙන්න මේකයි වුණේ. SAAB ඉංජිනේරුවෝ මේ යකාව ඉපැද්දුවේ SAAB 93 කාර් එකක් අරන්, අනවශ්‍ය බර සේරම ඉවත් කරලා, බොනට් එක පවා ප්ලාස්ටික් කරලා, 748cc three cylinder two stroke එන්ජින් දෙකක් හයිකරලා අරගෙන. එතකොට මේ එන්ජින් දෙකෙන් එන බලය 100bhp පැන්නුවා ලු. ඒක ඒ කාලේ හැටියට සහ කාර් එකේ හැටියට සෑහෙන ලොකු දෙයක්. අනික මේක පාන් බාගයක් විතර බර කාර් එකක් නිසා මේකේ උපරිම වේගය පැයට කිලෝමීටර් 196 විතර වුණා කියලා කියනවා.


Flickr


Såtenäs airfield එකේදී තමයි මෙහෙම පැයට කිලෝමීටර් 196 වාර්තා වෙලා තියෙන්නේ. නමුත් අවාසනාවට SAAB ඉංජිනේරුවන්ට අමතක වෙලා තියනවා 'අපි 196 ට ගියා' කිව්ව පලියට ලෝකය විශ්වාස නොකරන බව. ඒකට තමයි ස්වාධීන නිරීක්ෂකයෝ කියල ජාතියක් ඉන්නේ. අනික් අතට මේක එක පැත්තකට විතරක් දුවවලා හරියන්නෙත් නැහැ. ඉතින් මේ නිසා මේ වාර්තාව ගණන් ගැනුණේ නැහැ. 

ඊට පස්සේ Gelleråsen circuit එකේදිත් යකාව ටෙස්ට් කරලා තියනවා. එතකොට තේරුණාලු මේකේ ගිහින් වංගු ගන්නවා කියන එක ජීර්ණ පද්ධතියේ පවතින සියලුම ද්‍රව්‍ය අකාලිකව පිටතට එන වැඩක් කියලා. අනික් එක කාර් එකේ පවර් එක, ට්‍රාන්ස්මිෂන් වල පිනියන් වලට දරන්න බැරි මට්ටමට ආවලු. 

ඉතින් යකා බැඳගන්න බැරි වුණාම වෙන්නේ යකාව කුප්පියකට දාගන්න තමයි. 

ඊට පස්සේ කවදාවත් මේ යකාගෙන් වැඩ අරගෙනත් නැහැ. ඒ යකා වගේ වෙන යකෙක් හදන්න කවුරුවත් උත්සාහ කරලත් නැහැ. 


Flickr

ඉතින් යකා දැන් Trollhättan වල තියන SAAB කෞතුකාගාරයට වෙලා,  කම්මුලේ අතක් තියාගෙන, ඉස්සරහ බලාගෙන ඉන්නවා... 

ඕක තමයි කියන්නේ ඕනාවට වඩා වැඩ පෙන්නන්න කියාම යකා වුණත් තනි වෙනවා කියලා. 

මීට වැඩිය හොඳ මොරාල් එකක් ඔළුවට ආවොත් කොමෙන්ටු දාන කොටුවක කොටාගෙන යන්ඩ ආයිබොවන්ඩ! '


තරිඳු ශ්‍රී ලොකුගමගේ 

27.03.2019 

www.facebook.com/CarPissuwa

www.facebook.com/Soi11byTharinduSri



පසු සටහන්: SAAB ඉතිහාසය මීට වඩා ලස්සන බව මම දන්නවා. මගේ අරමුණ වුණේ යකා ගැන කතා කරන එක විතරයි. දවසක SAAB ඉතිහාසය ගැන වෙනම ලියන්නම්. 


කලින් කරපු පොත් ටික 












අලුත්ම පොත 
(රු. 500/-)




Monday, February 4, 2019

ටුක් ටුක් ටුක් ටුක් කර්තී චල්තී


ටුක් ටුක් ටුක් ටුක් කර්තී චල්තී තාරී මාරී සින්දගී 
රේ බෝලේ, රේ බෝලේ ඩෝලා ඩෝල ධඩක් ධින් 

කාර් පිස්සුවෙ සුපුරුදු පාඨකයෝ සමග මගේ පෞද්ගලික ජීවිතේ ගැන දන්නා මිත්‍රයෝ දැන් බලන්න ගන්නවා මූට අටවකපයිත්තියන්ද කියලා. 

මොකද මමයි හින්දි සිනමාවයි කියන්නේ හරියට කුරක්කන් පිටියි KFC එකයි වගේ දුරස්ථ දේවල් දෙකක්. 

අසෝකරත්න මහත්මයාගේ ස්කූටර් එක ගැන කතාවට පස්සේ  මකුළු දැල් බැඳිලා තිබුණු බ්ලොග් එකක් සුද්ද බුද්ද කරන්න ආපහු ස්කූටර් කතාවක්ම අරගෙන ආවම අනිවාර්යයෙන්ම පාඨක ප්‍රජාවට මතුවෙන ප්‍රශ්නයක් තියනවා. 

'තරිඳු අයියා ස්කූටරයක් ගන්නම වගේ නේ යන්නේ?'

හැමදාමත් දෙන උත්තරේ තමයි මට දෙන්න තියෙන්නේ. 

'වෙස්පා එකකට නම් මනාපයි. ඒ වුණාට දැන්ම ගන්න අදහසක් නැහැ.' 

ස්කූටර් ගැන කිව්වම මට එකපාරට මතක් වෙන දේවල් කීපයක් තියනවා. පොඩි කාලේ දැකලා පුරුදු මහින්ද මහප්පාගේ ස්කූටර් එක, කරුණාරත්න දිවුල්ගනේ මහත්මයා ගයන 'අජානේය ඉස්කූටර' ගීතය (ඔය ලොකු ලොකු sound effects පොරවල් මෙලොව එළිය දකින්නත් කලින් රේඩියෝ එකෙන් ඇත්තටම ස්කූටරයක් අපේ හිතේ මවාපු, රෝහණ වීරසිංහ මහත්මයාගේ ඒ අපූරු තනුව), ගියපාර ලිපියේ මම ලියපු අසෝකරත්න මහත්මයාගේ ස්කූටර් එක, අපේ ධනුකලා රුචිරලාගේ ස්කූටර්, ඔන්න ඔය වගේ දේවල්. ලංකාවේ මෑතකාලීනව එකපාරට පුළුල් වුණු ස්කූටර් සංස්කෘතියේ ආකර්ෂණීය අංග වගේම තොරොම්බල් අංගත් මගේ හිත සිතිවිලි වලින් පුරෝනවා, හරියටම ඉස්සරලාම සත්තු වත්ත දකින පොඩි එකෙකුගේ හිතට නැගෙන මින් මැදුරු හැලි වඳුරු අලි වසුරු සිතිවිලි වගේ... 

ස්කූටරේ කියන්නෙත් ෆොක්ස්වැගන් වගේම අකාලික දෙයක්. පරණ පරපුරත් අලුත් පරපුරත් කිසිම භේදයකින් තොරව යා කරන දෙයක්. ස්කූටර් ගැන කතා කරද්දී එක පරපුරකට තමන්ගේ රුචිකත්වය සාධාරණීකරණය කරන්න අවශ්‍ය වෙන්නේ නැහැ. 

ආයේ ස්කූටර් ගැන ලියන්න හිතුණේ අලුතින් ඇතිවුණු දීර්ඝ ආදරයක මැදකට අහුවුණු එක පුරුකක් නිසා. 

අලුත් ආදරය තමයි නූරන් සහෝදරියෝ දෙන්නා. මැද පුරුක තමන් සුල්තාන් කියන හින්දි චිත්‍රපටයට එයාලා ගායනා කරපු 'ටුක් ටුක්' කියන ගීතය. 

නූරන් සහෝදරියන් කියන්නේ ජ්‍යෝති නූරන් සහ සුල්තානා නූරන්. මේ දෙන්නා 70 දශකයේ සුප්‍රකට සුෆි ගායිකාවක් වුණු ස්වර්ණ් නූරන්ගේ මිණිබිරියෝ. එයාලට අවුරුදු දහය කාලේ ඉඳන් එයාලගේ තාත්තා වුණු උස්තාද් ගුල්ශාන් මිර් එයාලට සංගීතය පුරුදු පුහුණු කළා ලු. යූ ටියුබ් එකේ එළවලු රොටියක් කාලා ප්ලේන්ටියක් ගහලා රස්තියාදුවක් දානකොට නූරන් සහෝදරියන්ගේ ජීවිතේ මතක කෑලි එහෙන් මෙහෙන් අහුලගන්න පුළුවනි. 




නූරන් සහෝදරියන්ගේ මධුර ස්වර ඉස්සරලාම මගේ සවනේ වෙළුණේ සෝනා මොහාපත්‍රගේ සින්දුවක් හොයන්න ගිහින් යූ ටියුබ් එකේ පාර වැරදුණු වෙලාවක. ඉතින් මම මංමුලාවී පාර සොයාගෙන හසරක් අසමින් යනකොට මේ සමනලියෝ දෙන්නාගෙන් පාර ඇහුවා. අන්තිමට මේ සමනලියෝ එක්ක ස්වර සක්වළේ පියාසැරියක් ගැහුවේ නැත්නම් නින්ද යන්නේ නැති තැනට වැඩේ දුරදිග ගියා. 

ඔහොම යනකොට තමයි මට එයාලා සුල්තාන් චිත්‍රපටයට ගායනා කරපු 'ටුක් ටුක්' ගීතය හම්බුණේ. විෂුවල් එකේ තියෙන්නේ සම්පූර්ණ ගීතය නොවුණත් මට විෂුවල් එකෙන් තොරව සම්පූර්ණ ගීතය අහන්න හිතෙන්නේ නැහැ. 

හේතුව තමයි සල්මන් ඛාන් ඒකෙ පදින ස්කූටර් එක. 

කලිනුත් කිව්වා වගේ මම හින්දි සිනමාවේ රසිකයෙක් නෙමෙයි. ඒ නිසා මට සුල්තාන් චිත්‍රපටිය ගැන විස්තර හොයන්න වුණා. මේකේ තියෙන්නේ ජීවිතේ ඛේදාන්තයක් කරගෙන විශ්‍රාම ගිය මල්ලව පොර ශූරයෙක් තමන්ගේ ජීවිතේ ආපහු අල්ලාගැනීමේ වෑයමක් විදිහට ආයෙත්  තරගාවලියකට එක්වෙන කතාවක්. ප්‍රධාන චරිත රඟපාන්නේ සල්මාන් ඛාන් සහ අනුෂ්කා ෂර්මා (ඔවු කෝලිගේ අරයා තමයි). මේක වාණිජ වශයෙන් අතිශය ජනප්‍රිය චිත්‍රපටයක් වුණත් මට මේ වගේ කතා කොච්චර අප්පිරියද කියනවා නං කතාවේ සාරාංශය ලියන්න වත් කාලය මිඩංගු කරන්න හිතෙන්නේ නැහැ. 

සින්දුවේ විෂුවල් එකේ ජීවය පටන් ගන්නේ සල්මාන් හෙවත් චිත්‍රපටියේ හැටියට සුල්තාන් උදේක ස්කූටර් එක ස්ටාර්ට් කරන්න උත්සාහ කරන තැනින්. ස්කූටර් එක ස්ටාර්ට් වෙන්නේ නැහැ. එතකොට සුල්තාන් ස්කූටර් එක ඇල කරලා ගස්සලා ස්කූටර් එක ආයේ ස්ටාර්ට් කරනවා. 

සුදුපාට දුම් රොටුවක් දාලා ස්කූටර් එක ඇහැරෙනවා! 

යකඩ එක්ක ජීවිත් වෙන අපට ඔන්න දුම් සුවඳ (ගඳ නෙමෙයි, සුවඳ) දැනෙන්න ගන්නවා! 




එතනින් එහාට තියෙන්නේ සුල්තාන් ස්කූටර් එකේ යන දර්ශන සහ අතරමගදී සිද්ධ වෙන සිද්ධි ඇතුළත් දර්ශන පෙළක්.  එක තැනකදී සුල්තාන් ඉස්කෝලේ ඇරිලා එන කොලු පැංචෝ තුන්දෙකෙන් ස්කූටර් එකේ නග්ගගෙන ඇවිත්, පාර අයිනේ බීම විකුණන පුංචි කඩයක් ගාවට ඇරලවලා, එයා එතන ඉඳන් බීම එකක් බීලා යන දර්ශන පෙළකුත් ඒකෙ තියනවා.  




ජ්‍යෝති නූරන් 'ටුක් ටුක් ටුක් ටුක් කර්තී චල්තී තාරී මාරී සින්දගී' කියනකොට මම ඈත අතීතයක භාත්කණ්ඩේ විභාග කරන්න ගත්තු අසාර්ථක උත්සාහය මතක් වෙනවා. මට සංගීතය දිගේ ඉහළ යන්න හැකියාවක් නොලැබුණත් භාරතීය ශාස්ත්‍රීය සංගීතය රස විඳින්න අවශ්‍ය ශික්ෂණය මට ලැබුණේ ඒ පුංචි අවුරුද්දක කාලය ඇතුළේ. ජ්‍යෝතිගේ සහ සුල්තානාගේ සුපුහුණු හඬවල් වල මිහිරියාව හරියටම විඳගන්න නම් ඒ ශික්ෂණය අවශ්‍යයි. නැත්නම් සමහර වෙලාවට ජ්‍යෝතිගේ හිනාව ළඟ හිත නවතිනවා. ඒ හිනාව අමතක කරලා හඬේ සුපුහුණු සුලලිත බව දිගේ දුරට දුරට දුරට යන්න නම් ඒ ශික්ෂණය අවදි කරගන්නම ඕනේ. 




'ටුක් ටුක් ටුක් ටුක් කර්තී චල්තී තාරී මාරී සින්දගී' කියන්නේ, සරලව කියනවා නම්, ජීවිතේ ඒකටම ආවේණික රිද්මයකට අනුව ඉදිරියට ඇදෙනවා කියනවා වගේ දෙයක්. මම හින්දි දන්නේ නැහැ. මම මේක කියන්නේ වෙබ් සයිට් තුනක තිබ්බ තේරුම් සහ, ඉන්දියන් කාරයෝ එක්ක සාමාන්‍ය මට්ටමින් කතා කරන්න පුළුවන් මට්ටමට හින්දි දන්න කෞශිගේ අර්ථකථනයත් සංසන්දනය කරලා. ටුක් ටුක් කොටසින් ජීවිතේ වේගය වගේම සුල්තාන්ගේ ස්කූටරයේ හඬ හැඟවෙනවා කියලා dohaz.com වෙබ් අඩවිය කියනවා. 

බ්ලොග් එක ලියන්න තරම් විවේකයක් මට පහුගිය දවස් වල තිබුණේ නැහැ. මේකත් ලියන්නේ මට නූරන් සහෝදරියෝ ගැන සහ මේ ගීතය ගැන ලියන්න මීට වඩා හොඳ පදනමක් නැහැයි කියලා හිතුණු නිසා. 

www.filmyquotes.com වෙබ් අඩවියේ මේ ගීතය සහ ඒකෙ තේරුම දාලා තියෙන්නේ මෙහෙම. මේකට යටින් මම වීඩියෝ එකේ ලින්ක් එක දානවා. 


LyricsTranslation
Doori dard hai, milan hai mastiDistance is painful, union is fun
Duniya mujhko dekh ke hastiThe world looks at me and laughs
Ishq mera badnaam ho gayaMy love has been defamed
Karke teri husn parasatiAfter staring at your beautiful body


Koi jogi, koi kalanderSome saint, some spiritual leader
Rehta hai apne meinResides within us
Koi bhoola hua sikanderSome lost magician
Rehta hai apne meinResides within us
Koi jogi, koi kalanderSome saint, some spiritual leader
Rehta hai apne meinResides within us
Koi bhoola hua sikanderSome lost magician
Rehta hai apne meinResides within us


Ho sajke dikhayegiIt will adorn itself
Ho haske bulayegiIt will smile and call you
Ho rajke nachayegiIt will make you dance
Tuk tuk, tuk tuk karti chalti thari mhari zindagiOur lives are dancing and moving foward
Re bole, re bole dola dhol dhadak dhinThe drums are beating
Dhadak dhin, dhadak dhinThe drums are beating
Tuk tuk, tuk tuk karti chalti meethi thari zindagiYour sweet life is dancing and moving foward
Re bole, re bole dola dhol dhadak dhinThe drums are beating
Dhadak dhin, dhadak dhin, dhadak dhinThe drums are beating


Apni marzi se banti bigadtiIt becomes upset and happy by itself
Banti bigadti, banti bigadtiUpset and happy, upset and happy
Dhuaan nahin, aag nahin, phir bhi hai jaltiIt doesn't have smoke and fire, but still it burns
Oye hoye, oye hoye, oye hoye, oyeOye hoye, oye hoye, oye hoye, oye
Apni marzi se banti bigadtiIt becomes upset and happy by itself
Banti bigadti, banti bigadtiUpset and happy, upset and happy
Dhuaan nahin, aag nahin, phir bhi hai jaltiIt doesn't have smoke and fire, but still it burns
Oye hoye, oye hoye, oye hoye, oyeOye hoye, oye hoye, oye hoye, oye


It's a take downIt's a take down
You gonna hit the ground hardYou gonna hit the ground hard
When life gets you hard and dhobi pachaadWhen life gets you hard and smashes you
What loving fighting ain't far apartWhat loving fighting ain't far apart
You can love the fightYou can love the fight
But you can't fight your heartBut you can't fight your heart


Apni marzi se banti bigadtiIt becomes upset and happy by itself
Banti bigadti, banti bigadtiUpset and happy, upset and happy
Dhuaan nahin, aag nahin, phir bhi hai jaltiIt doesn't have smoke and fire, but still it burns
Oye hoye, oye hoye, oye hoye, oyeOye hoye, oye hoye, oye hoye, oye


God of the one and the ground start shakingGod of the one and the ground start shaking
Making sounds that you shouldn't be makingMaking sounds that you shouldn't be making
Taking steps out of your comfort zoneTaking steps out of your comfort zone
And you're fine to fight most of your battles aloneAnd you're fine to fight most of your battles alone


Ho thaare jaisi chanchal haiIs it calm like you
Resham hai ya malmal haiIs it soft like velvet
Ya phir gehri daldal haiOr is it a deep bog
Zindagi yaara ra ra raHow is life, my friend
Ho din din ghatti jaati haiEveryday it gets smaller
Fasal yeh katti jaati haiIt chops off like crops
Nazar se hatti jaati haiIt disappears from our eyes
Zindagi yaara ra ra raThis is life, my friend


Dil samjhe nahin patandarThis foolish heart doesn't understand
Rehta hai apne meinIt stays within itself
Bas banta phire dhurandharIt just roams around being brave
Rehta hai apne meinIt stays within itself
Dil samjhe nahin patandarThis foolish heart doesn't understand
Rehta hai apne meinIt stays within itself
Bas banta phire dhurandharIt just roams around being brave
Rehta hai apne meinIt stays within itself


Ho sajke dikhayegiIt will adorn itself
Ho haske bulayegiIt will smile and call you
Ho rajke nachayegiIt will make you dance
Tuk tuk, tuk tuk karti chalti thari mhari zindagiOur lives are dancing and moving foward
Re bole, re bole dola dhol dhadak dhinThe drums are beating
Dhadak dhin, dhadak dhinThe drums are beating
Tuk tuk, tuk tuk karti chalti meethi thari zindagiYour sweet life is dancing and moving foward
Re bole, re bole dola dhol dhadak dhinThe drums are beating
Dhadak dhin, dhadak dhin, dhadak dhinThe drums are beating
Tuk tuk, tuk tuk karti chalti meethi thari zindagiYour sweet life is dancing and moving foward
Re bole, re bole dola dhol dhadak dhinThe drums are beating
Dhadak dhin, dhadak dhin, dhadak dhinThe drums are beating


මේ පහළින් තියෙන්නේ යූ ටියුබ් එකේ තියන වීඩියෝ එක 




මේක කාර් පිස්සුවෙ සාමාන්‍ය ලිපි වලට වඩා වෙනස් බව ඇත්ත. නමුත් මේක නොලියා බැරි දෙයක් වුණා. ළඟදීම සාමාන්‍ය විදිහට ලිපි ලියන්න ආපහු පටන් ගන්න බලාපොරොත්තු වෙනවා. 

හැබැයි ආපහු කියෝනකොට හිතුණා පාන් නැතිවුණු දාට හදාගන්න ඉමර්ජන්සි පොල් රොටියේ ඒකටම ආවේණික රහක් තියනවා වගේ මේ ලිපියෙත් වෙනම රහක් තියනවා කියලා. ඒකට එකඟ වෙන නොවෙන එක ඔයාලගේ වැඩක්.  

තරිඳු ශ්‍රී ලොකුගමගේ 
03.02.2018 
www.facebook.com/CarPissuwa
www.facebook.com/Soi11byTharinduSri

















පොත් ටික සදීපා, සරසවි, සමයවර්ධන, විජිත යාපා, සුරස, එක්ස්පෝග්‍රැෆික්, ලුමිනෙක්ස්, අහස, ප්‍රසාද් පොත්හල වගේ තැන්වලින් වගේම grantha.lk සහ booksbay.lk වෙබ් අඩවි වලින් ගන්න පුළුවන්.