Wednesday, May 23, 2018

ඩම්ප් ට්‍රක් හැදුණු හැටි


Pinterest

අවුරුදු මිලියන ගාණක් තිස්සේ සතෙක් එලාගෙන, හේනක් වවාගෙන, අහස බලාගෙන ගෙවිච්චි මනුස්ස සංස්කෘතිය ඔළුවෙන් හිටගත්තේ කාර්මික විප්ලවයත් එක්ක. කාර් පිස්සුවෙ අපට වැදගත් වෙන විදිහට කියනවා නම් මනුස්ස ශ්‍රමය වෙනුවට ආදේශ කරන්න පුළුවන් යන්ත්‍රසූත්‍ර බිහිවීමත් එක්ක.

19 වන වන සියවසේ සහ 20 වන සියවසේ මුල නිර්මාණය වුණු කාර්මික යන්ත්‍රසූත්‍ර වල හරි අපූරු පෞරුෂයක් තියනවා කියල මට හිතෙනවා. තාක්ෂණය නහයට උඩින් කිලෝමීටර් සීයක් විතර ඉහළට ගිහින් තියන අද වගේ කාලෙක කාර්මික යන්ත්‍රසූත්‍ර පවා නිකං රෝස මලේ හදවත වගේ මටසිළිටි වෙලා තියෙන්නේ. මීට සාපේක්ෂව බලනකොට අර අතීතයේ මුලින්ම බිහිවුණු යන්ත්‍රසූත්‍ර මනුස්ස චින්තනයේ සහ සංස්කෘතියේ හදිස්සි වෙනසක් ගැන අපූරු කතාවක් කියනවා..

මේක බොහොම පුළුල් මාතෘකාවක් නිසා මම ඒ ගැන පොදුවේ කතා නොකර ඩම්ප් ට්‍රක්ස් (Dump Trucks) ගැන විතරක් කතා කරන්නම්.


Mike Jorgensen- Pinterest

කර්මාන්ත සාර්ථක වෙන්න නම් අමුද්‍රව්‍ය සැපයුම කාර්යක්ෂම සහ වාසිදායක වෙන්න ඕනේ. ඉස්සර ඊජිප්තුවේ පිරමීඩ හදන්න වහල්ලු ලක්ෂ ගාණක් දාලා අවුරුදු විස්සක් තිහක් උන්ව මැරෙව්වා වගේ කර්මාන්ත පවත්වාගෙන යන්න බැහැ. ඒ නිසා එකපාරට අමුද්‍රව්‍ය ගොඩක් අරගෙන ඇවිල්ලා, ඒවා ඉක්මනට අන්ලෝඩ් කරන ක්‍රම අවශ්‍ය වුණා. ඒ වගේම කුණු අදිනවා වගේ වැඩ වලදී පටෝගත්තු කුණු ටික මැද්දට බැහැලා සවල් ගගහා ඉන්නවා වෙනුවට ඒවා එකපාර හලලා දාන්න ක්‍රමයක් අවශ්‍ය වුණා.


බොක්කට වැදෙන්න කියනවා නම්, ප්‍රථම ප්‍රේමය අහිමි වුණු අලුත දවස් යනවා වගේ හෙමින් නැතුව, රස්සාවල් කරන මිනිස්සුන්ගේ සෙනසුරාදා සහ ඉරිදා දවස් ගෙවෙනවා වගේ ඉක්මනට ලෝඩ් අන්ලෝඩ් කරන ක්‍රමයක් අවශ්‍ය වුණා.

මේකට විසඳුමක් හැටියට තමයි ලෝකෙට ඩම්ප් ට්‍රක් බිහිවුණේ.

ඒ දවස් වල ලෝකයේ ප්‍රධානතම ඉන්ධන වුණේ ගල් අඟුරු. ඉතින් ගල් අඟුරු ප්‍රවාහනය කිරීමේ මාධ්‍යයක් විදිහට තමයි මුලින්ම මේ ඩම්ප් බොඩි නිර්මාණය වුණේ. මම ඩම්ප් බොඩි කියන යෙදුම පාවිච්චි කරන්නේ මේවා වෙනම වාහන වර්ගයකට වඩා වෙනම බොඩි වර්ගයක් විදිහට සලකන්න අවශ්‍ය නිසයි. 


Pinterest 

මුල් කාලයේ මේවා ඩම්ප් බොඩි හයිකරපු අශ්ව කරත්ත විදිහට ආපු බව ඔයාලා දැනටමත් අනුමාන කරලා ඇති. ඔවු, මේවා ඉස්සරාලම ආවේ එහෙම තමයි. හැබැයි මෙතැනදී මතුවන වැදගත්ම ප්‍රශ්නය තමයි ලෝඩ් එක ඩම්ප් කරන්න පාවිච්චි කරන ක්‍රමය මොකක්ද කියන එක. මොකද ඒ වෙනකොට මෝටර් හෝ Hydraulic තාක්ෂණ ලෝකයට බිහිවෙලා තිබුණේ නැහැ. ඉතින් මිනිස්සු තෝරාගත්තේ අපි කාගේත් නොදුටු මිතුරාගේ පිහිට තමයි. 

ඒ මොකාද ඒ? 

ඒ තමයි ගුරුත්වාකර්ෂණය... 

මේ ඩම්ප් බොඩි නිර්මාණය කරලා තිබුණේ ලෝඩ් එක ගැහුවට පස්සේ ගුරුත්ව කේන්ද්‍රය (Center of gravity) පිටිපස්සේ ඇක්සල් එකට පොඩ්ඩක් පිටිපස්සෙන් පිහිටන විදිහට. ලොක් එකකින් තමයි බොඩි එක අල්ලාගෙන හිටියේ. අන්ලෝඩ් කරන්න අවශ්‍ය තැනට ගිහිල්ලා ලොක් එක පැන්නුවාම ගුරුත්වාකර්ෂණය නිසා ලෝඩ් එක ඉබේම හැලුණා. මෙහෙම ලෝඩ් එක බෑවට පස්සේ තට්ටුව ඉබේම ආපහු වැටෙනවලු. ඊට පස්සේ ඔපරේට් කරන හාදයා තට්ටුව ලොක් එක දාලා ඊළඟ ලෝඩ් එක ගන්න යනවා. 


www.andrew.cmu.edu

මේවා මුල් කාලේ රෝද දෙකේ සහ රෝද හතරේ වර්ෂන් ඇවිත් තියනවා. මුල් කාලේ අශ්වයෝ කරපු වැඩේ පස්සේ ස්ටීම් ට්‍රක් වලට භාර වුණා. නමුත් මේ ඩම්ප් ක්‍රමේ ටික කාලයක් පැවතුණා. මේකේ තිබුණු ප්‍රධාන ප්‍රශ්නයක් තමයි බර හැමතිස්සෙම පිටිපස්සේ ඇක්සල් එකෙන් පිටිපස්සට ඒම. මේ විදිහට බර අසමාන විදිහට බෙදී ගියාම වාහනේ හසුරුවන්න අමාරු වෙන බව අමුතුවෙන් කියන්න අවශ්‍ය නැහැ නේ. 


Kenny Shackleford

Tom Woodruff- Pinterest

මීට අමතරව තව බොටම් ඩම්ප් සිස්ටම් එකකුත් තිබුණා. එතනදී බක්කිය තියෙන්නේ ඇක්සල් දෙක අතරේ. බොඩිය තියෙන්නේ කොටස් දෙකකට. චේන් එකකින් මේ කොටස් දෙක එකතු කරලා ලෝක කරලා තිබුණාලු. අන්ලෝඩ් කරන තැනට ගියාම ඔපරේටර් පැඩ්ල් එකකින් මේ ලොක් එක අරිනවා. එතකොට චේන් එක රිලීස් වෙලා බොඩියේ කෑලි දෙක දෙපැත්තට ගිහින් ලෝඩ් එක කරත්තේ පාමුල වැටෙනවා. 

දැන් සමහරුන්ගේ හිතේ මැවිලා ඇත්තේ මොකෙක් හරි සතෙක් මළපහ කරනවා වගේ දසුනක්. ඒ ගැන මට දොස් තියන්න එපා. Bottom Dump ක්‍රමේ තාමත් භාවිතා වෙනවා නේ. 


blackwood-hodge.typepad.com

1910 පන්නලා සියවසේ දෙවෙනි දශකයට එද්දී මෝටර් ට්‍රක් රථ පාවිච්චිය ජනප්‍රිය වෙමින් තිබුණේ. විශේෂ ට්‍රක් බොඩි හදන සමාගම් ඒ වෙනකොට දියුණු වෙලා තිබුණා. මෙයාලා ෆෝඩ් සහ මැක් වගේ චැසි වලට එක එක විදිහේ බොඩි නිර්මාණය කළා. මේ කාලේ ඩම්ප් බොඩි වර්ග කීපයක් දකින්න පුළුවන්. මේ අතරින් මෝටර් වලින් ක්‍රියාකරන වර්ග සහ Hydraulic පද්ධති වලින් ක්‍රියාකරන වර්ග ප්‍රධානයි. 


www.classicrefusetrucks.com- මේක 1921 අවුරුද්දේ පළවුණු, කුණු ලොරි වලට අදාළ බොඩි සම්බන්ධ දැන්වීමක් 


ඇත්තටම Hydraulic පද්ධති නිර්මාණය වීම තමයි ඩම්ප් ට්‍රක් තාක්ෂණය ඇතුළුව අද දවසේ කාර්මික රථවාහන බොහොමයක් නිර්මාණය දියුණු වෙන්න පදනම හැදුවේ. 



www.classicrefusetrucks.com


අද වෙද්දී ඩම්ප් ට්‍රක් තාක්ෂණය කොයි තරම් දුරකට දියුණු වෙලා තිබුණත් අතීතයේ ඩම්ප් ට්‍රක් වල තිබුණු තාක්ෂණයේ මූලිකාංග සහ අද දවසේ ඩම්ප් ට්‍රක් වල ප්‍රධාන අංග සමානයි කියලා 
www.hammertrucks.com වෙබ් අඩවිය පෙන්නලා දෙනවා. එතන පෙන්නලා දෙන මූලිකාංග මෙහෙමයි. 

1. ට්‍රක් ෆ්‍රේම් එක: එදා වගේම තාමත් ඩම්ප් ට්‍රක් වල පාවිච්චි වෙන්නේ තවත් බොහොමයක් දේවල් වලට පාවිච්චි කරන පොදු ට්‍රක් ෆ්‍රේම් එකක්මයි. ලොකු ලෝඩ් දරන්න පුළුවන් විදිහට මේවායේ සවිශක්තිය වැඩි කරලා තමයි ඩම්ප් ට්‍රක් විදිහට පාවිච්චි කරන්න ඩම්ප් බොඩි සහ යාන්ත්‍රික කොටස් සෙට් කරන්නේ. 

2. Hydraulic පද්ධති: ඇත්තටම කියනවා නම් ඩම්ප් ට්‍රක් වලට Hydraulic පද්ධති ඉස්සරලාම හඳුන්වලා දීපු දවස් වල ඉඳලා මේ දක්වා ඒවා භාවිතා වෙන විදිහ මහා ලොකුවට වෙනස් වෙලා නෑ ලු. අද වගේම එදත් සිද්ධ වුණේ Hydraulic පද්ධතියකින් බෙඩ් එක හෙමින් සීරුවේ ඉස්සිලා, ලෝඩ් එක බෑවට පස්සේ ආපසු හෙමින් සීරුවේ ආපහු පාත් වෙන එකයි. ඉස්සරම ට්‍රක් වල මේ පද්ධති වලට බල ලැබුණේ ස්ටීම් වලින්. පස්සේ මේවා ප්‍රධාන එන්ජිම හරහා PTO drive train එකකින් බලය ලබන ක්‍රම බවට පත්වුණා. එච්චරයි. 

3. ඩම්ප් බෙඩ් එක: ඩම්ප් බෙඩ් එකෙත් කියන්න තරම් මහලොකු වෙනසක් වෙලා නැහැ. වාහන වර්ගයේ හැටියට වෙනස් වුණත් පොදුවේ තාමත් සිද්ධ වෙන්නේ තට්ටුව ඉස්සුවාම පිටිපස්සේ දූර ඇරිලා ලෝඩ් එක බිමට වැටෙන එක තමයි. 

(වැඩි විස්තර කියවන්න කැමති අය www.hammertrucks.com වෙබ්සයිට් එකට යන්න). 

මේ වෙනකොට ඩම්ප් ට්‍රක් වල තාක්ෂණය සෑහෙන්න දියුණු වෙලා තියනවා වගේම ට්‍රක් වර්ග රාශියකුත් නිර්මාණය වෙලා තියනවා. මේ ට්‍රක් වල ෆොටෝ දැක්කම මතක් වෙන්නේ Kardashian ලගේ ෆැමිලි ෆොටෝ එක වගේ දේවල්. 


www.cherokeetruck.com/


ඩම්ප් ට්‍රක් ගැන පොඩි සටහනක් තියන්න හිතුණේ ඊයේ පෙරේදා Komatsu එකේ Haul Trucks වගයක් හම්බන්තොටින් ලංකාවට ගොඩ බැහැලා හෙමින් හෙමින් පුත්තලමේ යමින් ඉන්න බවට හතර අතින් ආරංචි ලැබෙන්න ගත්තු නිසයි. Komatsu එක මේවා නම්කරලා තියෙන්නේ Dump Trucks-Rigid විදිහට. මේ ට්‍රක්ස් විශේෂයෙන්ම පතල් වගේ දුෂ්කර තැන්වල දැවැන්ත බර කඳු අදින්නම හදාපුවා. මේ අතරින් මූලිකම මට්ටමේ ට්‍රක් එකේ payload capacity එක කිලෝග්‍රෑම් 36,500 ක්. රේන්ජ් එකේ ඉහළින්ම තියන ට්‍රක් එකේ  payload capacity එක කිලෝග්‍රෑම් 326,585 ක්!




  මේ ෆොටෝ එවුවේ ඉසුරු අමිල ජයලත්ගේ : www.facebook.com/CarPissuwa/posts/2236937902999362

එයාලගේ සයිට් එකට යන්න කම්මැලි අය වෙනුවෙන් ඒ චාට් එක මම මෙහෙම දානවා. මේවායේ සියලුම හිමිකම් එයාලා සතුයි.


Model
Engine Power (kW@rpm)
Weight (kg)
Payload Capacity (kg)
Travel Speed (kmph)
371@2000
31,600
36,500
70
371@2000
34,400
41,000
70
533@2000
43,100
55,000
70
533@2000
46,200
63,000
70
879@1900
72,000
91,000
65
1109@1900
249,478
144,100
58
1492@1900
328,401
181,436
64.5
1865@1900
385,848
221,648
64
2014@1900
454,363
254,000
64.5
2014@1900
501,974
291,790
64.5
2610@1900
505,755
291,790
64.5
2610@1900
576,072
326,585
64.5
2610@1900
576,072
326,585
64.5
2610@1900
625,277
326,585
61

මේක දැක්කම ඔයාලට වැඩේ පැහැදිලි ඇති. 




මේ ෆොටෝ ටික ලැබුණේ අරුණ දිසානායකගෙන් 

මේ ට්‍රක් වලට ලැබුණු ප්‍රතිචාරයේ දිග පළල දැක්ක නිසා, මේ ගැන උනන්දු වෙන අයට වැඩිදුර අධ්‍යයනය කරන්න දෙන මූලික ප්‍රවේශයක් විදිහට තමයි මේක ලිව්වේ. ගිය පාර ඩුකාටි ස්කූටර් එක ගැන ලිව්වට පස්සේ මීට වඩා නිර්මාණාත්මක දෙයක් ලියන්න හිතාගෙන හිටියත්, මේ මොහොතේ ඒ වගේ දේකින් මනෝ ගහනවට වඩා factual දෙයක් ලියන එක හොඳයි කියලා හිතුණා. 

මේකට ලැබෙන ප්‍රතිචාර අනුව ඊළඟ ලිපිය මොකක්ද කියන එය තීරණය වේවි... 

තරිඳු ශ්‍රී ලොකුගමගේ 
2018 මැයි 23 
www.facebook.com/CarPissuwa

(උපුටා ගන්න අවශ්‍ය අය කරුණාකරලා එක්කෝ අහන්න. නැත්නම් අදාළ තැන්වල කාර් පිස්සුවෙ නම හෝ ලින්ක් එක දාන්න)

පසු සටහන්:

1. ඩම්ප් ට්‍රක් වල ඉතිහාසය සරලව දැනගන්න කැමති අයට වැදගත් වෙන විස්තරයක් www.depaula.com වෙබ් සයිට් එකේ තියනවා. කැමති අය ගිහින් බලන්න.

2. කොමට්සු එකේ ට්‍රක් ගැන දැනගන්න ආසා අය www.komatsu.com.au වෙබ් සයිට් එකට යන්න. ඒක තොරතුරු ගබඩාවක්!

3. මේවා ගැන හොඳට දන්න කෙනෙක් ඉන්නවා නං මෙතන කොමෙන්ටුවක් දාලා සංවාදයක් පටන්ගන්න. ඒක වටිනවා.

Monday, May 14, 2018

Ducati Brio සහ ජෝන් සීනාගේ පාන් බේකරිය

www.topspeed.com

ඩුකාටි එක ස්කූටර් එකක් හැදුවා කියන එක හරියට ජෝන් සීනා බේකරියක් කරනවා කිව්වා වගේ දෙයක්. අඩු තරමින් ඩුකාටි එකේ ඉතිහාසය ගැන එච්චර අවබෝධයක් නැති අයට දැනෙන්නේ එහෙමයි. 

මමත් එහෙම කෙනෙක්. ඒ නිසා ඕස්ට්‍රේලියාවේ ඉඳන් තිළිණ ලංකා එවපු බයික් ෂෝ එකක ෆොටෝ සීයක් විතර අස්සේ තිබිලා Ducati Brio එකක ෆොටෝ දැක්කම මට ජෝන් සීනා මාළුපාන් අනනවා වගේ මනෝ චිත්‍රයක් මැවුණා. 

ඒ වුණාට පොඩ්ඩක් අන්තර්ජාලයේ රෙස්ලින් පාරක් දාලා බලද්දී ඩුකාටි එකට ස්කූටර් හැදිල්ල එච්චර නුපුරුදු දෙයක් නොවන බව පෙනුණා. නමුත් ඉතිං ලංකාවේ අපි බොහෝ දෙනෙක් ඒ ගැන දන්නේ නැති නිසා මේ පුංචි සටහන ලියන්න හිතුවා. 

ඩුකාටි එක ඉස්සරලාම ස්කූටර් එකක් මාකට් එකට දැම්මේ 1952 අවුරුද්දේ. ඒ තමයි Ducati Cruiser එක. ඩුකාටි එකේ පළවෙනි ස්කූටර් එක වීමට අමතරව ඒකෙ තව විශේෂතා දෙකක් තිබුණා. 

1. ඉතාලියේ පළවෙනි four-stroke ස්කූටර් එක වීම 

2. ඉතාලියේ automatic transmission සහිත පළවෙනි ස්කූටර් එක වීම 

ඒ කියන්නේ ඩුකාටි කෲසර් එක ෆෝ-ස්ට්‍රෝක් ඔටෝ භාණ්ඩයක්. 


www.ducati.com


මුලින් මේක ඇවිල්ලා තියෙන්නේ 12hp එන්ජිමක් එක්ක. පස්සේ ස්කූටර් වල උපරිම වේගය පැයට කිලෝමීටර් 50 ට සීමාවෙන්න ඕනේ කියලා ඉතාලියේ ආණ්ඩුවෙන් නීතියක් ගෙනාපු නිසා මේක 7.5hp දක්වා අඩු කළා ලු.  

ඒක හරියට ජෝන් සීනා තිස්පහේ මාළුපාන් වෙනුවට දහයේ මාළුපාන් විකුණන්න ගත්තා වගේ වැඩක්! 

Giovanni Fiorio තමයි එන්ජිම සැලසුම් කළේ. බොඩිය නිර්මාණය කරලා තියෙන්නේ සුප්‍රකට Ghia සමාගම එක්ක එකතු වෙලා. 

ඔවු. Volkswagen Karmann Ghia එක ඩිසයින් කරපු කට්ටියම තමයි. 

කොහොම වුණත් ඩුකාටි කියන්නේ ස්කූටර් කලාවේ කප්පිත්තෙක් නොවෙන නිසා ඩුකාටි කෲසර් එකට Vespa සහ Lambretta වගේ දැවැන්ත නම් එක්ක හැප්පෙන්න බැරුව ගියාලු. ඉතින් මාකට් එකට ඇවිත් අවුරුදු දෙකකට පස්සේ කෲසර් එක මාකට් එකෙන් අතුරුදන් වුණා. මේ අවුරුදු දෙකට කෲසර් 1,000 ක් වගේ තමයි හදලා තියෙන්නේ. 

ඩුකාටි එක ආපහු ස්කූටර් මාකට් එකට මුට්ටිය දාලා බැලුවේ 1963 අවුරුද්දේ. 

ඒ කාලේ වෙද්දී තරුණ පරපුර ආයෙමත් ආත්ම ගරුත්වය තියාගෙන ලාබෙට ගමන් බිමන් යන්න පුළුවන් ක්‍රම හොයන්න ගත්තා. ඒ නිසා ස්කූටර් වලට මාකට් එකේ තියන ඉල්ලුම ඉහළ ගියා. 

මෙහෙම පසුබිමක් තියනකොට මුට්ටිය නොදා ඉන්න එක මුට්ටියට කරන අපහාසයක්... 

ඒ කාලේ වෙද්දී ඉතාලි ගෘහ නිර්මාණ ශිල්පියෝ කාර්මික සැලසුම් පැත්තටත් යොමු වෙලා හිටියා. ඉතාලිය කොහොමත් කොයි කර්මාන්තයේදීත් ලස්සන ඩිසයින් පැත්තට ලොකු අවධානයක් දෙන රටක් (ඉතාලි කාර් වල තියන මායාවී ආකර්ෂණය ගැන මම ලියපු ලිපියක් 2018 මැයි 13 'අනිද්දා' පත්තරේ පළවුණා. පුළුවන් නම් හොයාගෙන කියවන්න). ඉතින් ඩුකාටි එක ඒ කාලේ හිටපු ප්‍රමුඛ පෙළේ නිර්මාණ ශිල්පියෙක්ව මේ වැඩේට ගාවගත්තා. 

ඒ තමයි Gio Ponti. සුප්‍රසිද්ධ Pirelli Tower ගොඩනැගිල්ල පවා මෙයාගේ සැලැස්මක්. ඒ වගේම එයා 50 දශකයේදී Fiat එකේ කාර් ප්‍රොජෙක්ට් එකකටත් සම්බන්ධ වෙලා කටයුතු කරලයි හිටියේ.


en.wikipedia.org


1953 Milan Exhibition එකේදී තමයි ඉස්සරලාම Ducati Brio එක හඳුන්වලා දුන්නේ. 


www.ducati.com


ඉස්සරලාම ආවේ Brio 48 එක. ඒ කියන්නේ 48cc එන්ජිම. ඊට පස්සේ 100cc වර්ෂන් එකක් ආවා. මේ 100cc එක Bologna වල ට්‍රැෆික් පොලීසිය පවා පාවිච්චි කළා ලු. පස්සේ කාලෙක එන්ජින් ධාරිතාව අඩු කරලා 50 cc වර්ෂන් එකක් හඳුන්වලා දුන්නා කියලා www.ducati.com වෙබ් අඩවියේ තියනවා.  

Ducati Brio එකේ විශේෂ ලක්ෂණ දැනගන්න කැමති නම් මේ වෙබ් අඩවියට යන්න. මේවා සංකීර්ණ තාක්ෂණික යෙදුම් සහිත විශේෂතා නිසා මම ඒවා සිංහලට හරවන්න යන්නේ නැහැ. 

Brio එක ෆුල් ටෑන්ක් කරලා පැයට කිලෝමීටර් 40 වේගෙන් කිලෝමීටර් 220 ක් යන්න පුළුවන් වුණා ලු. තුට්ටු දෙකට ලස්සනට රවුම් ගහන්න ක්‍රම හොයපු පරම්පරාවකට මීට වඩා තෑග්ගක් තවත් කොයින්ද! 





මේ ෆොටෝ හතරම ඕස්ට්‍රේලියාවේ ඉඳන් එවුවේ තිළිණ ලංකා. එහෙ බයික් ෂෝ එකකදී තමයි එයා මේක දැකලා තියෙන්නේ. 


Brio එක අලෙවි වුණු හෝ නිෂ්පාදනය වුණු ප්‍රමාණවල් මූලාශ්‍රවල දක්වලා නැහැ. ඒ වුණාට අද කාලේ මේ ස්කූටර් ගොඩක් දුර්ලභ නිසා Brio එකත් එච්චර සාර්ථක වෙන්න නැතුව ඇති කියලා අපට හිතන්න පුළුවන්. 

ඒ වුණාට ජෝන් සීනා පාන් පිච්චුවා කියලා දැනගත්තු එකෙත් අමුතු ආතල් එකක් තියනවා. 

හා නැද්ද? 


තරිඳු ශ්‍රී ලොකුගමගේ 
2018 මැයි 14 
www.facebook.com/CarPissuwa

පසු සටහන්:  ප්‍රධාන වශයෙන් තොරතුරු ගත්තේ www.ducati.com වෙබ් අඩවියෙන්.  Brio එකක ෆොටෝ එවපු තිළිණ ලංකාට මගේ විශේෂ ස්තූතිය. නිල් පාට ස්කූටර් එකේ ෆොටෝ වල සියලු හිමිකම් එයා සතුයි. අනික් ෆොටෝ ගත්තු තැන් ඒ ෆොටෝ වලට යටින් දාලා තියනවා. ලිපියේ සහ කරුණු වල සිංහල පරිවර්තනයේ හිමිකම් මගේ. උපුටාගන්න අවශ්‍ය නම් අහලා ගන්න. නැත්නම් මම කළා වගේ credit දාන්න. ස්තූතියි.  


Tuesday, April 10, 2018

Pride of Ownership Drive 2018



සුපුරුදු විදිහටම 9 ශ්‍රී 5333 ත් අරගෙන හිල්ටන් එකට යනකොට පොඩ්ඩක් ප්‍රමාද වුණා. සාමාන්‍යයෙන් නිවාඩු දවසක ගෙදරින් පිට යනකොට පූසන්ගෙන් සමාව ඉල්ලලා, ඉක්මනට එන්නම් කියලා ආයාචනාත්මකව දැනුම් දීලා, cat logistic ප්‍රශ්න ටිකක් විසඳලා තමයි යන්න ඕනේ. ඒකට ටිකක් වැඩිපුර වෙලා යනවා.

මෙදා පාර Pride of Ownership Drive එක තියනවා කියලා දැනගන්න ලැබුණේ ඉවෙන්ට් එකට දවස් තුනකට කලින්. අධික වැඩ රාජකාරි තිබුණත් බේරුවල ගමන මගඅරින්න හිත දුන්නේ නැහැ. ඔය අතරේ අපේ හිතවත් ආසිරි ඇල්ලගේත් කතා කරලා මතක් කළා, මේ දවස් වල කාර් පිස්සුවෙ කට්ටිය මම Mini එකට තැන දෙනවා වැඩියි කියලා චෝදනා මුඛයෙන් භාෂණයේ යෙදෙන බව. ඒ නිසා කොහොම හරි ඔෆිස් ටයිම් එකට බොරැල්ල හන්දියේ ඩියුටි වැටුණු ට්‍රැෆික් පොලිස් රාළහාමි කෙනෙක් වගේ වැඩ රාජකාරි වලට එහාට මෙහාට විසිල් ගහලා ඉරිදා දවස වෙන් කරගත්තා.  

ටිකක් පරක්කු වෙලා ගිය එකේ එකම එක වාසිය වුණේ සූරියආරච්චි මහත්මයාගේ 1 ශ්‍රී 5662 ළඟ පාක් කිරීමේ අවස්ථාව ලැබීම.




සූරියආරච්චි මහත්මයාව මම ඉස්සරලාම අඳුරගත්තේ ඩාලි පාරේදී. එතුමා ඒ දවස් වල කාර් එක හදනවා. 1 ශ්‍රී 5662 දැකපු ගමන් මම ඒකට වහ වැටුණා, හරියට මීට දශක දෙකකට උඩදී ඉස්සරලාම Titanic ෆිල්ම් එකේ දර්ශනයක් සහිත බුක් මාක් එකක් දැක්ක වෙලේ Kate Winslet ට වහවැටුණා වගේ! 

Pride of Ownership Drive එකකට අපි පළවෙනි වතාවට සහභාගී වුණේ 2016 අවුරුද්දේ. එතකොට පානදුර හරියේ ඉඳන් කළුතර හරියට වෙනකල්ම අපි ගියේ එතුමාගේ කාර් එක පිටිපස්සේ. එතුමා කොයිතරම් හොඳට වාහනේ හදලාද කියන එක, නවත්තලා තියෙද්දී පෙනුණාටත් වඩා හොඳට අපට පාරේදී පෙනුණා. එදා ඉඳන් මමයි කෞශියි දෙන්නම ඔය කාර් එකට ආදරෙයි.




හිල්ටන් එකේ Sports Center එක මාර්තු 25 වෙනි ඉරිදා උදේ පෙනුණේ හරියට අලුතින් ඕපන් කරපු කප් කේක් ෂොප් එක්ක ෂෝ කේස් එකක් වගේ. බීට්ල් එක කියන්නේ ඔරිජිනල් ආපු පාටවල් වලට වගේම පසුකාලීන අයිතිකාරයෝ වෙන අපි කැපීපේන්න ගාන ස්මාර්ටීස්, මාෂ්මෙලෝස්, ඇපල් කේක් සහ සාරවිට පාටවල් වලටත් එක වගේම ලස්සනට පේන වාහනයක්. ඒ නිසා අද කාලේ එකම පාටින් තියන බීට්ල් දෙකක් දැකගන්න හම්බවෙන්නේ දැන් යශෝධා විමලධර්මගේ කඳුළක් දැකගන්න ලැබෙන තරම් කලාතුරකින් (මේක දූදරුවෝ ඔරිජිනල් රන් එක බලාපු පරම්පරාවල් වලට විතරක් තේරෙන ජෝක් එකක්).







ලියාපදිංචි කටයුතු ඉවර කරලා, ක්ලබ් එකෙන්ම සංවිධානය කරලා තිබුණු උදෑසන ආහාරයත් අරගෙන ඊට පස්සේ අපි කාර් පාක් එක පුරා ඇවිද ඇවිද පළවෙනි ෆොටෝ සෙට් එක ගත්තා. අලුතින් මේ වැඩේට එකතු වෙලා තිබුණු Karmann Ghia එකට තමයි ඒ වෙලාවේ වැඩිපුරම අපේ කැමරා ඇස ඇදුණේ. සුපුරුදු විදිහට කපිල ජයවර්ධන මහත්මයාගේ Trekker එකත් හිතින් ඉඹලා ඉවර වෙලා තමයි ඉතුරු වාහන ටික ෆොටෝ ගන්න ගියේ.





සාමාන්‍යයෙන් දැන් සිරිතක් විදිහට මෙහෙම තැනකට ගියහම ප්‍රේමතිලක මහත්තයා සහ කහ කිරිල්ලී ඇවිත් ඉන්නවද කියලා බලනවා. තාමත් එතුමා දන්නේ නැහැ මම මේ විදිහට, අවස්ථාවක් ලැබෙන හැම වෙලාවෙම එතුමා ගැන ලියනවා කියලා. මම මේ කියන්නේ මොකක්ද කියලා නොදන්නා අය පස්සේ නිවාඩු පාඩුවේ 'ජර්මනියට පෙම් කරලා කහ කිරිල්ලිව කරකාර බැන්ද ප්‍රේමතිලක මහත්තයා' කියන ලිපිය කියවන්න. 




එතන තිබුණු කාර් අතරින් අපේ සංසාර සංචාරය තවත් කිලෝමීටර් සීයකින් විතර දීර්ඝ කරවන තෘෂ්ණාවක් ඇතිකරවපු කාර් එකක් තමයි EL 571 අංකය දරන split එක. ඒකත් අයිති ක්ලබ් එකේ ජ්‍යෙෂ්ඨ සාමාජික කපිල ජයවර්ධන මහත්මයාටමයි කියලා මගේ හිතමිත්‍ර ඩේවිඩ් ජැන්සේ මට කිව්වා. මේ වගේ දුර්ලභ කාර් එකක් මේ වගේ විශිෂ්ට මට්ටමින් පවත්වාගැනීම ගැන කපිල ජයවර්ධන මහත්මයාට අපේ ආචාරය! (කපිල ජයවර්ධන මහත්මයා ගාව විවිධ මාදිලි ගොඩක් සහිත විශිෂ්ට වාහන එකතුවක් තියනවා කියන එක මෙතනදී බොහොම ගෞරව පූර්වකව සඳහන් කරන්න අවශ්‍යයි). 







මූලික කටයුතු ටික ඉවර වෙලා වාහන ටික උදේ 10 ට විතර බේරුවල යන්න පිටත් වුණා. මෙතන ඉඳන් ෆොටෝ ගැනීමේ මූලික වගකීම පැවරෙන්නේ කෞශිට. කෞශි හැමදාම වාහන ටික පිටත් වෙන අවස්ථාවලදී සහ ඩ්‍රයිව් එකේදී ලස්සන ෆොටෝ ටිකක් අරන් දෙනවා. මේ අතරින් මම ආසම තැනක් තමයි කොල්ලුපිටිය හන්දියේ ඉඳන් ආර්. ඒ. ද මැල් මාවත පැත්තට හැරෙන තුන්මං හන්දිය. එතනදී හැමදාම කෞශි ලස්සන ෆොටෝ එකක් ගන්නවා. මෙදා පාරත් ඒ දසුන හරි අපූරුවට කෞශිගේ කැමරාවේ සටහන් වෙලා තිබුණා. 




පාර පුරා තියන ට්‍රැෆික් ලයිට් සහ රියදුරන්ගේ need for speed එක වගේ සාධක නිසා කාර් වලට එක පෙළට යන්න අමාරුයි. ඒ වගේම අර බයිසිකල් රේස් වගේ ස්පීකර් ගහගෙන අනික් වාහන නවත්තගෙන යටිගිරියෙන් කෑගහගෙන යන සිරිතක් ෆොක්ස්වැගන් රැලි වල නැති නිසා සැරින් සැරේ තැන් තැන්වල නතර වෙලා කට්ටිය එක්කාසු කරගෙන තමයි යන්න වෙන්නේ. මේ විදිහට අපි රත්මලාන, එගොඩ උයන සහ කළුතර කියන තැන්වල නවත්තලා වාහන ටික එකතු වෙනකල් ඉඳලා තමයි බේරුවල ගියේ. 












බේරුවල Eden Resort & Spa එකේදී සුපුරුදු විදිහට දරුවන් වගේම වැඩිහිටියන් වෙනුවෙනුත් විනෝද ක්‍රීඩා වගේ දේවල් සංවිධානය කරලා තිබුණා. බඩයි හිතයි පිරෙන්න කෑම බීම ගන්නත් සියලු කටයුතු සැලසුම් කරලයි තිබුණේ. ඒ නිසා අධික උෂ්ණ කාලගුණය මැද වුණත් කවුරුත් හොඳට විනෝද වුණා. 

මටත් කෞශිටත් දැනුණු ලොකුම සතුට තමයි සුපුරුදු විදිහට කාර් පිස්සුව හරහා අඳුරගත්තු හිතවත්තු මේ වගේ තැන්වලදී හැබෑවටම හමුවීම. ප්‍රේමතිලක මහත්මයාගේ පවුලේ සාමාජිකයන් වගේම දුමින්ද ජයවර්ධන, තමරු ද සිල්වා වගේ අය මේ විදිහට කාර් පිස්සුව හරහා අඳුරගත්තු අය. මේ වගේ අයගේ හිතවත්කම් කවදත් කෞශිටත් මටත් ගොඩක් වටිනවා.

ඉවෙන්ට් එක ඉවර වෙලා සුපුරුදු විදිහට වටිනා තෑගි සහ සහතිකපත් බෙදලා දීම සිද්ධ වුණා. ඒ වගේම ප්‍රේමතිලක මහත්මයා වෙනුවෙන් අපූරු කේක් එකකුත් ලෑස්ති කරලා තිබුණා. මේ ඔක්කොම සිද්ධ වෙලා, ස්තූති කතාවත් ඉවර වුණාට පස්සේ අපි කට්ටියගෙන් සමු අරගෙන එන්න ආවා.  
















මීට කලිනුත් මම Pride of Ownership drive එකක් ගැන ලියලා තිබුණු නිසා සහ මේ පාරත් අපි ගියේ බේරුවල Eden Resort & Spa එකට නිසා මම ඒ ගැන වැඩිදුර විස්තර ලියන්න යන්නේ නැහැ. කොහොමද වුණත් කලින් ලිපි වල ලියපු විදිහටම මේ ලිපියේදීත් VW Beetle Owners' Club of Sri Lanka එකට ස්තූති කළ යුතුමයි. ඉවෙන්ට් එකේ ගාස්තුව විදිහට නාමිකව සුළු මුදලක් විතරක් අරගෙන මේ තරම් කෑමබීම, තෑගිබෝග, සහතික සහ තවත් ගොඩක් දේවල් සංවිධානය කරන එක ඉතාමත් අගය කළ යුතුයි. 



ඔය හිටගෙන ඉන්නේ ක්ලබ් එකේ සභාපති පීටර් ජාසිංහ මහත්මයා 

සාමාන්‍යයෙන් මම ක්ලබ් එක ගැන ලියන හැම වෙලාවකම වගේ සමහරු මගෙන් අහන ප්‍රශ්නයක් තියනවා. ඒ තමයි මම කාර් වලට සිංහලෙන් ආදරය කිරීම ගැන කතා කරන අතරේ ඉංග්‍රීසියෙන් වැඩ කරන ක්ලබ් එකක් වර්ණනා කිරීමේ තේරුම මොකක්ද කියන එක. 

ඉතාම අවංකව කියනවා නං, අද අපි හැමෝටම මේ විදිහටම ෆොක්ස්වැගන් වලට ආදරේ කරන්න පටන් ගන්න කලින්, ජ්‍යෙෂ්ඨ සාමාජිකයන් පිරිසක් එක්ක මේ සම්ප්‍රදාය අකුරට ආරක්ෂා කරගෙන එන්න උරදුන්නේ VW Beetle Owners' Club එක. ෆොක්ස්වැගන් වලට මේ තරම් ඩිමාන්ඩ් එකක් නොතිබුණු කාලේ පවා බීට්ල් එක cultural symbol එකක් විදිහට ශ්‍රී ලංකාවේ මහපොළොවේ පවත්වාගෙන ආවේ VW Beetle Owners' Club එක. 

එයාලාගේ දීර්ඝකාලීන සාමාජිකයන්ගේ කාර් බොහොමයක්, ආදරේ ලබමින් පිපිච්ච රෝස මල් වගේ perfect එකට තිබ්බ නිසා තමයි අපට ගුරු කරගන්න ආදර්ශ මහ ගොඩක් ලැබුණේ. අපි ආදර්ශ ගත්තේ ඉන්ටනෙට් එකෙන් නෙමෙයි. අපි අදටත් කියන්නේ නැහැ, Chip Foose ගේ ප්‍රෝග්‍රෑම් එකක් බලලා අහවලා කාර් එකක් හැදුවා කියලා. අපි අදටත් කතා කරන්නේ අපේම ජ්‍යෙෂ්ඨයෝ කාර් හදාපු හැටි, නඩත්තු කරපු හැටි සහ ඩ්‍රයිව් කරපු හැටි ගැන. ෆොක්ස්වැගන් සම්බන්ධයෙන් ගත්තම ඒ සම්ප්‍රදාය සජීවීව තිබුණේ VW Beetle Owners' Club එක නිසා. ඒ නිසා අලුතින් බිහිවෙලා තියෙන, අපේ රටේ ෆොක්ස්වැගන් සංස්කෘතියට අමිල මෙහෙවරක් කරන සංවිධාන, සංගම් සහ සංචාර අතරේ VW Beetle Owners' Club of Sri Lanka එකට මගේ තියන ගෞරවය නොවෙනස් ව තියෙන්නේ ඒකයි. 

පුළුවන් කමක් තියනවා නම්, ඊළඟ ඉවෙන්ට් එක තියන දවස ගැන අවධානයෙන් ඉඳලා, එදාට ඇවිත් යන්න එන්න. 


තරිඳු ශ්‍රී ලොකුගමගේ 
10.04.2018 
www.facebook.com/CarPissuwa 

(මේ සියලුම ඡායාරූප මම සහ කෞශි ගත්තුවා. මේ වගේ ඉවෙන්ට්ස් වලට යන්න, ෆොටෝ ගන්න සහ ඒවා ඔයාලා වෙනුවෙන් පළකරන්න අපි කාලය, ශ්‍රමය සහ මුදල් වැය කරනවා. ඒ නිසා මේවා හොරෙන් ගන්න එපා).